Bettunizazione : in Sardegna dinù

Isule surelle, ancu in u scempiu urbanisticu è in a bettunizazione.

U giurnale La Nuova Sardegna face casu d'un bellu prugettu d'incimentizazione di 120 ettari nant'à a cummuna di Palau, in Gallura.

C'eranu suspetti di scruccuneria in stu prugettu di "maxi-lottizzazione". Dop'à un annu d'inchiesta, 54 persone sò state messe in causa : vinditori, acquistadori, prumutori immubiliari, trafficoni è bettunizadori. Si trattava di fà custruisce nant'à terre distinate à l'agricultura.

Forse, quallà dinù, un passiunatu di parpaing averà dettu chì "on va pas laisser que du maquis à nos enfants".

In Corsica cum'è in Sardegna, a pressione immubiliare hè sempre cusì forte nant'à u liturale. È cum'ella hè longa a cumpagnia di quelli chì preferiscenu u cimentu à a virdura...