Face cascà u so iPhone 6 novu novu, è li stà bè

Averete siguramente vistu sta video d'un poveru australianu chì lampa u so iPhone 6 in terra dopu à avellu compru, sott'à a pressione di e camerà.

U corciu, ci ne vulia bè unu, hè cascatu nant'à ellu. Ùn si pò avè a so minuta di gloria è un iPhone 6 novu, senza qualcosa in cambiu.

Altrimenti, una volta di più era a panicca davant'à e butteghe d'Apple appena da per tuttu in u mondu.

S'ampara cusì nant'à Clubic chì u primu pariginu à avè cumpratu l'iPhone 6 si chjama Sylvain è hà campatu durante trè ghjorni davant'à u magazinu.

Trè ghjorni à campà fora cum'è un SDF (allora ch'ellu ci n'hè chì campanu in carrughju, ma chì ùn l'anu micca scelta è chì patenu a fame...) per avè un teleffunu à 1000 € dunque, per pigliassi in selfie, per dì à i so amichi nant'à Facebook ch'ellu hà manghjatu una salade chêvre chaud à meziornu è per ghjucà à Clash of clans...

Ma tuttu và bè per ellu, hè cuntentu.

À u Giappone, Le Figaro ci ampara chì "les premiers clients sont applaudis en héros".

Listessu affare in Toronto, à u Canada, induve c'eranu parechje ore d'attesa davant'à a buttega.

Micca siguru chì tuttu què sia un segnu di bona salute di a nostra sucetà...