Un sonniu zitellinu ?

Quella publicità palisava un zitellucciu stallatu à u scagnu d'un albergu, ghjustu davanti à l’armadiu di e cantarette per e chjave.

È u slogan ci parlava di l’avvene, ecc. U nostru scopu ùn hè micca di cundannà u turisimu, un settore chì face puru campà parechji corsi, è i zitelli sò à spessu aduprati da l’annunziatori, ùn hè micca a prima volta. Ma ci simu appena interrugati nant’à l’intensioni di sta publicità è u missaghju ch’ella vulia fà passà.

Di solitu, u fattu di parlà di i mistieri sunniati da i zitelli hè spessu l’occasione di mintuà i pumpieri, i duttori, i veterinari, l’astrunauti, ecc. Induve hè a parte di sonniu è di candore in sta publicità ? Perchè aduprà a fiura di un cininu per valurizà un settore d'attività assai dipendente di i cuntesti ecunomichi, è soprattuttu pocu ammaistratu in Corsica?

Forse simu noi i candidi, in stu mondu in crisi è pienu d’incertezza induve si deve primurà di l’impiegu è di u stenta pane u più prestu.

Ma dunque u missaghju quì postu seria chì u turisimu pò esse cunsideratu cum'è un puntellu essenziale di l’avvene, cum'è una vera scelta di sucetà, dirigendu u campà di e generazioni future ?

Forse sta questione meriteghja megliu chè una publicità in l’ultima pagina di u CM.